Պատրաստ եմ հոկտեմբերին պայքարել Իսլամի դեմ. Ծառուկյան

Խառը ոճի ռուսաստանցի մարտիկ (MMA) Արման Ծառուկյանը պատրաստ է մենամարտել UFC-ի թեթեւ քաշային կարգում բացարձակ չեմպիոն Իսլամ Մախաչովի հետ հոկտեմբերին: Այս մասին Ծառուկյանը պատմել Է ՏԱՍՍ-ին։ 

Հունիսի 2-ին Մախաչովը հաջող պաշտպանեց տիտղոսը՝ հինգերորդ ռաունդում խեղդող հնարքով հաղթելով ամերիկացի Դասթին Պորիերին: Ծառուկյանն ապրիլին հաղթել էր բրազիլացի Չարլզ Օլիվեյրային եւ գլխավորել UFC-ի թեթեւ քաշային կարգի վարկանիշային աղյուսակը:

«Պատրաստ եմ հոկտեմբերին պայքարել Իսլամի դեմ», - ասաց Ծառուկյանը:

Մախաչովը 32 տարեկան է, ունի 26 հաղթանակ և 1 պարտություն խառը մենամարտերում: Ռուսաստանցին UFC-ում հաղթական շարքը երկարացրել է մինչեւ 14 մենամարտ: Ծառուկյանը 27 տարեկան է, իր ակտիվում ունի 22 հաղթանակ՝ 3 պարտություն կրելով ՄՄԱ-ում: UFC-ում մարզիկն անցկացրել է 11 մենամարտ՝ հաղթելով դրանցից 9-ում: Պարտություններից մեկը Ծառուկյանը կրել է կազմակերպության հովանու ներքո կայացած դեբյուտային մենամարտում՝ մրցավարների միաձայն որոշմամբ պարտվելով Մախաչովին։