Բուլղարիայի օդանավակայանում հայկական պատվիրակությանը ենթարկել են նվաստացուցիչ զննության. ԶԼՄ

Սոֆիայի «Վասիլ Լևսկի» օդանավակայանում տեղի է ունեցել աղմկահարույց դիվանագիտական սկանդալ, հաղորդում է բուլղարական Blitz-ը։

Հոկտեմբերի 1-ին Բուլղարիա ժամանած հայկական պատվիրակությունը՝ Անի քաղաքի քաղաքապետ Արման Սարիբեկյանի գլխավորությամբ, ենթարկվել է նվաստացուցիչ զննության։ Ըստ հաղորդումների, նրանց ստիպել են ամբողջությամբ մերկանալ, հարցաքննել են և մի քանի ժամ պահել ծառայողական տարածքներում։

Պատվիրակությունը Բուլղարիա էր ժամանել Նովի Պազար քաղաքի քաղաքապետ Գեորգի Գեորգիևի հրավերով։ Նրա վկայությամբ, բոլոր պաշտոնյաներն ու ուղեկցողները ունեցել են անհրաժեշտ փաստաթղթեր և Շենգենյան վիզաներ, որոնք տրամադրվել էին Բուլղարիայի դեսպանատան կողմից Երևանում։ Այնուամենայնիվ, ժամանումից հետո՝ գիշերը ժամը 02:20-ին, նրանց կանգնեցրել է սահմանային ոստիկանությունը։

«Մեր հյուրերին տարել են առանձին սենյակ, ստիպել են մերկանալ և ենթարկել մանրամասն զննության։ Բացվել են անձնական իրերը, նույնիսկ վնասվել է նվեր բերած նկարի շրջանակը։ Ամեն ինչ ուղեկցվել է վիրավորական հարցերով՝ ովքեր են, ինչու են եկել և ինչու հենց հիմա», — պատմել է Գեորգիևը։

Ըստ նրա, ոստիկանները հայտարարել են, թե կասկածում են պատվիրակությանը՝ սահմանը ապօրինի հատելու և Ավստրիա մեկնելու մտադրության մեջ։ Զրույցը տեղի է ունեցել միայն բուլղարերեն և անգլերեն, իսկ ռուսերենով բացատրվելու փորձերը անտեսվել են։

Պատվիրակությունը ազատ է արձակվել միայն երկուսուկես ժամ անց, սակայն նրանց հրահանգվել է վերադառնալ օդանավակայան հոկտեմբերի 4-ին և լքել Բուլղարիան, հակառակ դեպքում նրանց սպառնացել է մուտքի արգելք։

Հայաստանի դեսպանը Սոֆիայում՝ Ծովինար Համբարձումյանը, պաշտոնական բողոքի նոտա է հղել Բուլղարիայի արտաքին գործերի նախարարին՝ դատապարտելով «բարեկամ երկրի պաշտոնական պատվիրակության հանդեպ անընդունելի և նվաստացուցիչ վերաբերմունքը»։

Չնայած միջադեպին, հայկական պատվիրակությունը կարողացել է մասնակցել Նովի Պազարում կազմակերպված տոնական միջոցառումներին։