ԱՄՆ-ի և Չինաստանի առաջնորդների հանդիպումը կարող է չկայանալ. Financial Times
ԱՄՆ նախագահ Դոնալդ Թրամփի և Չինաստանի նախագահ Սի Ցզինպինի միջև նախատեսված հանդիպումը կարող է չկայանալ։ Այս մասին հաղորդում է Financial Times-ը:
«Պաշտպանության նախարար Փիթ Հեգսեթը և պետքարտուղար Մարկո Ռուբիոն բանակցություններ են վարել իրենց չինացի գործընկերների հետ, ինչը ենթադրություններ է առաջացրել նախագահների միջև հանդիպման մասին։ Սակայն ԱՄՆ-Չինաստան առևտրային բանակցություններում առաջընթացի բացակայությունը նվազեցրել է Պեկինում գագաթնաժողովի հավանականությունը», - ասվում է հաղորդագրության մեջ։
Նշվում է, որ Թրամփը և Ցզինպինը կարող են դեռ հանդիպել Ասիա-խաղաղօվկիանոսյան տնտեսական համագործակցության (APEC) գագաթնաժողովում, սակայն այս հանդիպումը պակաս նշանակալից կլինի։
Հիմնական խնդիրն այն է, որ, ըստ Վաշինգտոնի, Չինաստանը շարունակում է ԱՄՆ-ին մատակարարել ֆենտանիլի արտադրության մեջ օգտագործվող քիմիական նյութեր։ Պեկինը, իր հերթին, մտահոգված է ԱՄՆ-ի կողմից սահմանված մաքսատուրքերով։
