Ուկրաինայում տեղակայվող օտարերկրյա զորքերը Ռուսաստանի կողմից կդառնան թիրախ․ Պուտին
Ուկրաինան պահանջում է շփումներ Ռուսաստանի Դաշնության հետ, ես պատրաստ եմ այդ շփումներին, բայց ես չեմ տեսնում իմաստը դրանում, համաձայնության հասնել հնարավոր չի լինի։ Այս մասին հայտարարել է Ռուսաստանի նախագահ Վլադիմիր Պուտինը․ գրում է «ՏԱՍՍ»-ը։
Նրա խոսքով, եթե Ուկրաինայում հայտնվեն որևէ օտարերկրյա զորքեր, նրանք կդառնան Ռուսաստանի զինված ուժերի օրինական թիրախ, և եթե երկարաժամկետ խաղաղության համաձայնագրեր կնքվեն, օտարերկրյա զորքերի կարիքը չի լինի։
«Մինչ օրս ոչ ոք լրջորեն չի քննարկել անվտանգության երաշխիքները Ռուսաստանի հետ։ Դրանք պետք է գոյություն ունենան և՛ Ռուսաստանի Դաշնության, և՛ Ուկրաինայի համար։ Ռուսաստանը լիովին կպահպանի Ուկրաինայի վերաբերյալ խաղաղության համաձայնագրերը, երբ դրանք կնքվեն։ Եթե ուկրաինական կողմից ինչ-որ մեկը իսկապես ցանկանում է հանդիպել, մենք պատրաստ ենք», - ընդգծել է Պուտինը։
Պուտինը նշել է, որ Կիևը վերջերս բացառել էր Ռուսաստանի հետ շփումների հնարավորությունը, և այժմ խնդրում է, որ նման շփումներ տեղի ունենան։
Նրա խոսքով՝ Ուկրաինայի մասնակցությունը ՆԱՏՕ-ին ուղղակիորեն վերաբերում է Ռուսաստանի անվտանգության շահերին։
«Ըստ Ուկրաինայի սահմանադրության՝ տարածքների վերաբերյալ համաձայնագրերը պետք է հաստատվեն հանրաքվեով, սակայն դրա համար պետք է վերացվի ռազմական դրությունը։ Ռուսաստանը երբեք չի առարկել Ուկրաինայի եվրաինտեգրման նախաձեռնություններին»,- հավելել է ՌԴ նախագահը։
