Թրամփը մաքսատուրքերի հետ կապված նոր հրամանագրեր է ստորագրել
ԱՄՆ նախագահ Դոնալդ Թրամփը ստորագրել է հրամանագրեր՝ 69 երկրների, տարածքների և Եվրամիության նկատմամբ 10%-ից մինչև 41% ներմուծման մաքսատուրքեր սահմանելու մասին։
Դրանք ուժի մեջ կմտնեն յոթ օր հետո։ Բացառություն է Կանադան, որի համար դրանք կգործեն անմիջապես։
Կանադայի դեպքում Թրամփը մաքսատուրքերը 25%-ից բարձրացրել է մինչև 35%։ Սակայն այդ մաքսատուրքերը չեն տարածվում ԱՄՆ-ի, Մեքսիկայի և Կանադայի միջև USMCA առևտրային համաձայնագրով ընդգրկված ապրանքների վրա։
Ամենաբարձր մաքսատուրքը՝ 41%, սահմանվել է Սիրիայի համար, իսկ Լաոսի և Բիրմայի համար՝ 40%։ Ամենացածր մաքսատուրքը՝ 10%, սահմանվել է Մեծ Բրիտանիայի և նրա Ֆոլքլենդյան կղզիների համար։
Սպիտակ տան հրապարակած ցուցակում Բրազիլիայի համար նշված է 10% մաքսատուրք, թեև նախորդ օրը Թրամփը ստորագրել էր այդ երկրից ներմուծման համար 50% մաքսատուրք սահմանելու մասին հրամանագիր։
