Ադրբեջանի ԱԳՆ-ն սպառնացել է վերանայել Ռուսաստանի հետ հարաբերությունները

Հայազգի նկարիչ Իվան Այվազովսկու (Հովանես Այվազյան) կիսանդրու տեղադրումը «մեր տարածքում»՝ (օկուպացված Արցախում) առանց ադրբեջանական կողմի համաձայնության, անօրինական էր։ Այս մասին հայտնում է Ադրբեջանի ԱԳՆ-ն:

«Սա Ռուսաստանի կողմից Ադրբեջանի Հանրապետության ինքնիշխանության նկատմամբ անհարգալից վերաբերմունքի դրսևորում էր։ Ռուս բարձրաստիճան պաշտոնյաները պետք է հասկանան, որ եթե հակաադրբեջանական գործողություններն ու հայտարարությունները շարունակվեն, ապա չի կարելի բացառել Ադրբեջանի և Ռուսաստանի միջև հարաբերություններում նշված անհավասարակշռության վերանայումը»,- ասված է հայտարարության մեջ:

Հիշեցնենք՝ Մարիա Զախարովան Ստեփանակերտում Այվազովսկու հուշարձանի ոչնչացման մասին տեղեկությանն արձագանքել է նրանով, որ տեղադրել է աշխարհահռչակ նկարչի կտավներն ու գրել.

«Ինչ-որ տեղ վերացնում են նրա հուշարձանները, իսկ ես վերացնում եմ նրանց անգրագիտությունը, ովքեր երբեք չեն տեսել նրա կտավները»:

Ավելի վաղ հայտնի էր դարձել, որ Ադրբեջանի իշխանությունները քանդել են Այվազովսկու հուշարձանը նկարչի ծննդյան օրը։