Եվրամիությունը որոշեց. Իսրայելի դեմ պատժամիջոցներ կսահմանվեն
Եվրոպական դիվանագիտության ղեկավար Կայա Կալասը հաջորդ շաբաթ կհնչեցնի Իսրայելի դեմ սահմանափակող միջոցների տարբերակները՝ կապված Գազայի հատվածում նրա ռազմական գործողության հետ: Այս մասին հայտնում է Euractiv պորտալը՝ հղում անելով իր աղբյուրներին։
Նրանց տեղեկություններով՝ դիտարկվում են մի քանի սցենարներ, այդ թվում՝ ԵՄ-ի հետ Իսրայելի ասոցացման համաձայնագրի ամբողջական կամ մասնակի կասեցումը, պաշտոնյաների, զինվորականների եւ վերաբնակիչների նկատմամբ պատժամիջոցները: Բացի այդ, ինչպես պնդում են աղբյուրները, Եվրամիությունը կարող է սահմանափակել առևտուրն Իսրայելի հետ, էմբարգո սահմանել զենքի մատակարարման վրա կամ դադարեցնել գիտատեխնիկական համագործակցությունը:
Ինչպես նշում է Euractriv-ը, ԵՄ-ի հետ ասոցացման համաձայնագրի կասեցումը հնարավոր է միայն ազգային կառավարությունների կողմից այդ միջոցին միաձայն աջակցության դեպքում: Պորտալի զրուցակիցների խոսքով՝ առավել հավանական է, որ Եվրամիությունը սահմանափակվի կոնկրետ անձանց նկատմամբ պատժամիջոցներով, ինչպես դա արդեն արել են Ավստրալիան, Մեծ Բրիտանիան, Կանադան, Նոր Զելանդիան և Նորվեգիան:
Սպասվում է, որ ԵՄ երկրների ԱԳ նախարարները հնարավոր միջոցառումները կքննարկեն հուլիսի 15-ին: Նույն օրն Իսրայելը պետք է հաշվետվություն ներկայացնի Գազայի հատվածում հումանիտար իրավիճակի բարելավման մասին։
