Փաշինյանն ընդունել է Իրանի փոխնախագահին. ինչ է քննարկվել

Վարչապետ Նիկոլ Փաշինյանն ընդունել է Իրանի Իսլամական Հանրապետության նախագահի տեղակալ Սեյեդ Համիդ Փուրմոհամմադիի գլխավորած պատվիրակությանը։

Նիկոլ Փաշինյանը ողջունել է Իրանի փոխնախագահի այցը Հայաստան՝ ընդգծելով տարածաշրջանում խաղաղության և կայունության ամրապնդման կարևորությունը։ Վարչապետը վստահություն է հայտնել, որ դա կնպաստի ամբողջ տարածաշրջանում հարաբերությունների և համագործակցության շարունակական զարգացմանը։

Սեյեդ Համիդ Փուրմոհամմադին վարչապետին է փոխանցել ԻԻՀ նախագահ Մասուդ Փեզեշքիանի ջերմ ողջույնները։ Նա նաև շնորհակալություն է հայտնել Հայաստանի կառավարությանը՝ դժվարին իրավիճակում Իրանի նկատմամբ ցուցաբերած դիրքորոշման և մարդասիրական աջակցության համար։

Այնուհետև կողմերը քննարկել են Հայաստան–Իրան սահմանային ենթակառուցվածքների զարգացման ծրագրերի ընթացքը։ Մասնավորապես, անդրադարձ է եղել երկրորդ կամրջի և նոր տերմինալի կառուցմանը, մաքսային ոլորտում համագործակցության հետևողական զարգացմանն ու մաքսային ընթացակարգերին առնչվող հարցերին։ Երկուստեք ընդգծվել է նաև էներգակիրների ոլորտում համագործակցության զարգացման կարևորությունը։

Քննարկվել են ճանապարհաշինության համատեղ ծրագրերը, ինչպես նաև գյուղատնտեսության, հանքարդյունաբերության, ենթակառուցվածքների և այլ ոլորտներում համագործակցության հետագա զարգացմանն ուղղված քայլերը։

Զրուցակիցները մտքեր են փոխանակել նաև տարածաշրջանային հաղորդուղիների ապաշրջափակման գործընթացների և այդ ուղղությամբ նոր հնարավորությունների վերաբերյալ։

Հանդիպման ավարտին վարչապետ Նիկոլ Փաշինյանը Իրանի նախագահ Մասուդ Փեզեշքիանին է փոխանցել իր ջերմ ողջույնները։