Ինձ արթնացրել են, երբ ամեն ինչ վերջացել էր. Իսրայելի նախագահ
Իսրայելի նախագահ Իսահակ Հերցոգը BBC-ին ասել է, որ ԱՄՆ-ի որոշումը՝ հարվածելու Իրանի միջուկային օբյեկտներին, պատմական էր և քաջ։
Լրագրողի հարցին, թե արդյոք Իրանի միջուկային հզորությունը լիովին ոչնչացվել է, Հերցոգը պատասխանել է, որ մանրամասներ չունի, բայց ասել է, որ «բավական պարզ է, որ Իրանի միջուկային ծրագիրը լուրջ վնաս է կրել»։
Հարցին, թե արդյոք Իսրայելը ուղղակիորեն խնդրել է ԱՄՆ-ին հարվածել, Հերցոգը պատասխանել է. «Մենք որոշեցինք դա թողնել ամերիկացիների հայեցողությանը»։
Նա նաև ընդգծել է, որ անձամբ տեղյակ չի եղել նախապատրաստվող գործողության մասին։
«Ինձ արթնացրել են, երբ դա տեղի ունեցել ու վերջացել», - ասել է նա։
Հարցին, թե արդյոք Իսրայելը հիմա կդադարեցնի Իրանի վրա հարձակումը, Հերցոգը ուղիղ պատասխան չի տվել՝ ասելով միայն, որ Իրանը շարունակում է ռմբակոծել Իսրայելի տարածքը, և «մենք պետք է անենք այն ամենը, ինչ անհրաժեշտ է հրթիռներից պաշտպանվելու համար»։
