Պայթունի հետևանքով հիվանդանոց տեղափոխվածներից մեկը վիրահատվել է. Կարեն Տոնոյան

«Առավոտյան ստացանք լուրը, անմիջապես պատրաստ ենք եղել, «Սուրբ Գրիգոր լուսավորիչ» ԲԿ է տեղափոխվել երեք քաղաքացի»,- այս մասին NEWS.am–ի հետ զրույցում նշել է «Սուրբ Գրիգոր լուսավորիչ» ԲԿ շտապ և անհետաձգելի բժշկական օգնության ընդունարանի Բաժանմունքի վարիչ Կարեն Տոնոյանը՝ անդրադառնալով Ճամբարակում բնակելի շենքում տեղի ունեցած պայթյունին։

«Առաջին պացիենտը, որ տեղափոխվել է, վիճակը գնահատվել է ծանր, անկայուն, անմիջապես տեղափոխվել է վիրահատարան։ Այս պահին վիրահատությունն ավարտվել է, վիճակը համեմատաբար կայուն է, տեղափոխվել է վերակենդանացման բաժանմունք։

Մյուս երկու պացիենտները տեղափոխվել են հիվանդանոցի ընդունարան, որտեղ հետազոտվելուց հետո նրանց վիճակը ևս գնահատվել է ծանր, տեղափոխվել են վերակենդանացման բաժանմունք հետագա հսկողության։

Այսօր նրանք կանցկացնեն վերակենդանացման բաժանմունքում, վիճակներից կախված արդեն համապատասխան հետագայում պլանային կարգով հետազոտությունները, միջամտությունները կարվեն»,–ասել է Տոնոյանը:

Ավելի վաղ հայտնել էինք Ճամբարակում տեղի ունեցած պայթյունի հետևանքով զոհերի և վիրավորների մասին: