Մոսկվայում առևանգված հայազգի գործարարին ձերբակալեցին

Մոսկվայի դատարանը երկու ամսով կալանավորել է բլոգեր և բիզնես մարզիչ Արեգ Շչեպիխինին: Այս մասին հայտնում է Մոսկվայի դատարանների մամուլի ծառայությունը, հաղորդում է «ՏԱՍՍ»-ը:

Նա մեղադրվում է ծայրահեղականության դրդման մեջ (ՌԴ Քրեական օրենսգրքի 280-րդ հոդվածի 2-րդ մաս) և սեռի, ռասայի կամ ազգության վրա հիմնված ատելություն հրահրելու մեջ (ՌԴ ՔՕ 282-րդ հոդվածի 2-րդ մասի «ա» կետ):

Նշվում է, որ Շչեպիխինը մի քանի օր շարունակ իր սոցցանցերում էթնիկ հիմքով վիրավորանքներով, այդ թվում՝ Չեչնիայի բնակիչների հասցեին տեսանյութեր է հրապարակել։

Հավելենք՝ Արեգ Շչեպիխինին առևանգել են հունիսի 3-ի երեկոյան: Յարոսլավսկի երկաթուղային կայարանի հարևանությամբ հրապարակում մի քանի հոգի բռնել են նրան և խցկել Չեչնիայի իշխանությունների համարանիշներով սև «Մերսեդեսի» բեռնախցիկը: Չեչնիայի իշխանությունները հայտարարել են, որ Շչեպիխինին «ոչ թե առևանգել են, այլ կալանավորել», քանի որ նրա նկատմամբ հետաքննություն է անցկացվում՝ հավատացյալների զգացմունքները վիրավորելու համար։