Բաքուն կոչ է արել Դելիին չսխալվել հայ-ադրբեջանական հարաբերությունների հարցում
Պաշտոնական Բաքուն կոչ է անում Դելիին «ուշադիր լինել, չսխալվել հայ - ադրբեջանական հարաբերությունների հարցում»։ Այս մասին հայտարարել է Ադրբեջանի արտաքին գործերի փոխնախարար Յալչին Ռաֆիևը՝ մեկնաբանելով Հնդկաստանի և Պակիստանի միջև վերջերս ծագած լարվածությունն ու Բաքվի անվերապահ աջակցությունն Իսլամաբադին։
«Պակիստան - Հնդկաստան հակամարտության հարցում Ադրբեջանի տեսակետը հիմնված է միջազգային իրավունքի նորմերի վրա։ Հնդկաստանը և այլ երրորդ պետություններ պետք է ուշադիր լինեն հայ - ադրբեջանական հարաբերությունների հարցում, որոնք այժմ «փխրուն» փուլում են:
Մենք ակնկալում ենք, որ բոլոր պետությունները, այդ թվում՝ Հնդկաստանը, այնպիսի կոնկրետ քայլերի չեն դիմի, որոնք կարող են հարված հասցնել հայ - ադրբեջանական կարգավորման գործընթացին»,- ասել է ադրբեջանցի դիվանագետը:
Ադրբեջանցի դիվանագետը վրդովվել էր The Times of India պարբերականի հոդվածից, ըստ որի՝ Հայաստանը, ԱՄՆ-ն և Ֆրանսիան 2023-2024 ֆինանսական տարում դարձել են հնդկական պաշտպանական արտադրանքի խոշորագույն ներկրողները։
