Դուք լավ գիտեք` ինչի է ընդունակ ԱՄՆ ԶՈւ-ն. ՊՆ նախարարը սպառնացել է Իրանին

ԱՄՆ պաշտպանության նախարար Փիթ Հեգսեթը հայտարարել է, որ Իրանը պատասխանատվության կենթարկվի Եմենի հութի ապստամբների «Անսար Ալլահ» շարժմանն օգնելու համար։

«Ուղերձ Իրանին. մենք տեսնում ենք ձեր մահացու աջակցությունը հութիներին: Մենք հստակ գիտենք, թե ինչ եք անում: Դուք լավ գիտեք, թե ինչի է ընդունակ ԱՄՆ զինված ուժերը, և ձեզ նախազգուշացրել են: Ձեր համար հետևանքներ կլինեն մեր ընտրած ժամանակին և վայրում», - գրել է նա X-ում:

Մարտի 15-ին Միացյալ Նահանգները սկսեց զանգվածային հարվածներ հասցնել հութիների թիրախներին, որոնք վերահսկում են Եմենի տարածքի մոտ մեկ երրորդը։ Գործողությունն ուղղված է ամերիկյան շահերի պաշտպանությանը և նավարկության ազատության ապահովմանը, հայտնել են ԱՄՆ կենտրոնական հրամանատարությունից։ Ի պատասխան՝ Անսար Ալլահը պարբերաբար հարվածներ է հասցնում Կարմիր ծովի հյուսիսում գտնվող USS Harry S. Truman ավիակրին հրթիռներով և անօդաչու սարքերով։