Նոր լարվածություն Հնդկաստանի և Պակիստանի միջև ․ Պակիստանը արտաքսեց հնդիկ դիվանագետներին

Հնդկաստանի և Պակիստանի սահմանին՝ Քաշմիրի շրջանում, երրորդ գիշերն անընդմեջ հրաձգությունը շարունակվում է: Այս մասին հաղորդում է AFP-ն։

Հնդկաստանը մեղադրել է Պակիստանին անդրսահմանային ահաբեկչությանն աջակցելու մեջ՝ մեծամասամբ մուսուլման բնակչությամբ Քաշմիրում վերջին քառորդ դարի ընթացքում խաղաղ բնակչության վրա ամենասարսափելի հարձակումն իրականացնելուց հետո։

Իսլամաբադը հերքել է իր մասնակցությունը՝ Պակիստանին հարձակմանը կապելու փորձերը անվանելով անհիմն և խոստանալով արձագանքել Հնդկաստանի ցանկացած գործողության։

Միավորված ազգերի կազմակերպությունը կոչ է արել Հնդկաստանին և Պակիստանին «առավելագույն զսպվածություն դրսևորել, որպեսզի խնդիրները հնարավոր լինի լուծել խաղաղ ճանապարհով՝ կառուցողական համագործակցության շնորհիվ»։

Հավելենք՝  Նյու Դելին կասեցրել է ջրային պաշարների բաժանման մասին պայմանագիրը, հայտարարել Պակիստանի հետ ցամաքային սահմանային խոշոր անցակետի փակման մասին, նվազեցրել դիվանագիտական ​​հարաբերությունների մակարդակը և չեղարկել պակիստանցիների համար նախատեսված վիզաները։

Ի պատասխան, Իսլամաբադը հնդիկ դիվանագետներին և ռազմական խորհրդականներին արտաքսելու հրաման է տվել, չեղարկել է վիզաները Հնդկաստանի քաղաքացիների համար՝ բացառությամբ սիկհ ուխտավորների, և իր կողմում փակել գլխավոր սահմանային անցակետը։

Ի դեպ Իսլամաբադը Հնդկաստանի դեմ ռազմական գործողությունների չի դիմի, եթե նրա կողմից իրավիճակի սրում չլինի: Իսլամաբադը դժվար թե միջուկային պատերազմի գնա Հնդկաստանի հետ: Այս մասին РИА Новости-ին տված հարցազրույցում հայտարարել է Պակիստանի պաշտպանության նախարար Հավաջա Ասիֆը:

Պակիստանը ցանկանում է միջազգային հետաքննություն անցկացնել Ջամուի և Քաշմիրի ահաբեկչության վերաբերյալ, քանի որ իր հասցեին մեղադրանքները մերկապարանոց է համարում: Այս մասին հայտարարել է Ասիֆը: