Ուոլցը և Ռուբիոն պաշտպանել են իրանական օբյեկտներին հարված հասցնելու գաղափարը
ԱՄՆ ազգային անվտանգության հարցերով խորհրդական Մայք Ուոլցը և ԱՄՆ պետքարտուղար Մարկո Ռուբիոն պաշտպանել են իրանական օբյեկտներին ռազմական հարված հասցնելու գաղափարը, որը պոտենցիալ կապ ունի միջուկային զենքի ստեղծման հետ: Այս մասին հայտնում է The Washington Post-ը՝ վկայակոչելով անանուն պաշտոնյաներին։
Միևնույն ժամանակ նախագահ Թրամփը լսել է խնդրի դիվանագիտական լուծման կողմնակիցների, այդ թվում՝ լրագրող Թաքեր Կարլսոնի տեսակետները։
Ավելի զուսպ մոտեցման կողմնակիցները նշում են, որ ԱՄՆ հետախուզության գնահատականները հուշում են, որ Թեհրանը մտադիր չէ միջուկային զենք ստեղծել, և որ Իրանի ռմբակոծումը, հավանաբար, ավելի լայն տարածաշրջանային պատերազմի կհանգեցնի:
Մինչ այս Իրանը վստահություն էր հայտնել, որ Թեհրանի միջուկային ծրագրի շուրջ բանակցությունների կողմերը կկարողանան համաձայնության գալ։ Իրանի և ԱՄՆ-ի պատվիրակությունների միջև բանակցությունների հաջորդ փուլը՝ նվիրված Թեհրանի միջուկային ծրագրի շուրջ տարաձայնությունների լուծմանը, տեղի կունենա ապրիլի 19-ին Հռոմում։
