Թեժ լեզվակռիվ՝ Ազգային ժողովում

Ազգային ժողովում «Հայաստան» խմբակցության պատգամավոր Քրիստինե Վարդանյանի ելույթի ժամանակ լեզվակռիվ սկսվեց նիստը վարող ԱԺ փոխխոսնակ Ռուբեն Ռուբինյանի եւ «Հայաստան» խմբակցությունից Արթուր Խաչատրյանի միջև:

«Ասում եք՝ 2024 թվականը եղել է ամենախաղաղ տարին։ Եթե Սյունիքն էլ տաք, 2025-ը ընդհանրապես խաղաղ կլինի»,- ԱԺ ամբիոնից, դիմելով ՔՊ-ական պատգամավորներին, ասաց «Հայաստան» խմբակցության պատգամավոր Քրիստինե Վարդանյանը։ 

Արթուր Խաչատրյանը ելույթի ժամանակ տեղից ինչ-որ բաներ էր բղավում, որին արձագանքեց Ռուբեն Ռուբինյանը. «Ուրեմն լսեք ինձ, պարոն Խաչատրյան, նախ սուս մնացեք, հետո իմ հետ խոսեք հարգալից, հետո մի անցեք ձեր չափերը»:

Արթուր Խաչատրյանը հայտարարեց, որ ինքն է իր չափերը գծում:

«Ուրեմն լավ չեք գծում, ուրեմն ես կգծեմ հիմա ու հանգստացեք, հանգստացեք ասեցի, հանգստացի, հանգիստ»,-արդեն բղավելով ասաց Ռուբեն ռուբինյանը եւ նույն բարձր տոնով Քրիստինե Վարդանյանին հորդորեց շարունակել իր ելույթը:

Քրիստինե Վարդանյանն իր ելույթում հղում անելով ՔՊ-ական պատգամավորներին շփոթեց երկու պատգամավորներին և ասաց. «Չեմ հիշում Մարիա Կարապետյանը, թե Սոնա Ղազարյանը, շատ տարբերություն չկա»:

Ռուբինյանը կոչ արեց հարգալից խոսել պատգամավորների մասին. «Դուք էլ տեղից լռեք, պարոն Մինասյան»,-հայտարարել է նա դիմելով «Հայաստան» խմբակցության քարտուղար Արծվիկ Մինասյանին, ով տեղից ինչ-որ բան էր բղավում:

Մանրամասները՝ տեսանյութում։