Իրենք չեն ուզում, որ մենք ունենանք սահման․ Արսեն Թորոսյան

«Ընդդիմությունն ուզում է մեզ ներքաշել այն բանավեճի մեջ, թե ով է ավելի շատ թուրք»։ Այս մասին Աժ-ում իր ելութի ժամանակ ասաց ՔՊ-ական պատգամավոր Արսեն Թորոսյանը։

«Իրականում շատ դժվար է դիմանալ այդ գայթակղությանը և չմտնել այդ բանավեճի մեջ։ Ընդդիմությունը դրան զուգահեռ ուզում է, որ չլինենք անկախ։ Քրիստինե Վարդանյանը ռուսի շպիոնների ցանկեր ա նշում, ստեղ չի հիմա, երևի պետք ա ցանկը լրացնի, ամբողջական չէր»,- ասաց Թորոսյանը՝ նշելով, որ սահմանազատումը եղել է ձեռքբերում։

«Իրենք չեն ուզում, որ մենք ունենանք սահման՝ պետականության ամենակարևոր ատրիբուտներից մեկը»,- ասել է նա՝ անդրադառնալով «Հայաստան» խմբակցության պատգամավոր Քրսիտինե Վարդանյանի հայտարարություններին, թե երկրի սահմանը որոշվել է ՔՊ վարչությունում։ 

«Չէ, տիկին Վարդանյան, մենք չենք որոշել ու չենք էլ ուզում որոշել։ Պետական սահմանը որոշվել է անկախանալիս, որին դուք դեմ եք եղել ու մինչև հիմա դեմ եք»,-ասել է Թորոսյանը։

Պատգամավորը վստահեցրել է, որ իշխանությունը սահմանազատելու է սահմանը մինչև վերջ. «Չունենա՞նք սահման։ Դուք չեք ուզում սահման ունենանք, որ հետո հեշտ լինի տարբեր պետությունների տակ պառկեցնելը»։

Անդրադառնալով իրականացվող ծրագրերին՝ Թորոսյանն ասաց․ «Մեր հիմնական խնդիրը պետք է լինի բնակչության աճը։ Ցավալի վիճակագրություն՝ հունվար-փետրվար ամսիներին -500 ծնունդ ունենք»։

Նա նշեց, որ խնդրի լուծման համար պետք են առաջնահերթություններ փոխել։