Իրանի ԱԳ նախարարը Գրոսիին կոչ է արել
Իրանի արտաքին գործերի նախարար Աբբաս Արաղչին Ատոմային էներգիայի միջազգային գործակալության (ՄԱԳԱՏԷ) գլխավոր տնօրեն Ռաֆայել Գրոսիի հետ հանդիպման ժամանակ ՄԱԳԱՏԷ-ին կոչ է արել չտրվել ճնշմանը, որը որոշ պետություններ փորձում են գործադրել։ Այս մասին ասված է Իրանի ԱԳՆ Telegram ալիքում հրապարակված հաղորդագրության մեջ։
Արաղչին գործակալությանը կոչ է արել կատարել իր պարտավորությունները՝ «առանց որոշ երկրների կողմից ավելորդ ճնշումների ենթարկվելու»։
Նախարարը վերահաստատել է «Իրանի վճռականությունը շարունակելու ներգրավվել և համագործակցել ՄԱԳԱՏԷ-ի հետ՝ իր միջազգային իրավական պարտավորությունների շրջանակներում»՝ կարգավորելու իրանական միջուկային ծրագրի շուրջ ստեղծված իրավիճակը։ Արտաքին գործերի նախարարության ղեկավարը Գրոսսիին տեղեկացրել է Թեհրանի և Վաշինգտոնի միջև բանակցությունների առաջընթացի մասին։
Հիշեցնենք՝ ապրիլի 16-ին ատոմային էներգիայի միջազգային գործակալության (ՄԱԳԱՏԷ) գլխավոր տնօրեն Ռաֆայել Գրոսսին Թեհրանում Իրանի արտգործնախարարության շենքում հանդիպել և բանակցություններ է վարել Իրանի արտգործնախարար Աբբաս Արաղչիի հետ:
