Ռուսաստանը պատրաստ է դրան․ Գալուզին
Մոսկվան տրամադրված է Վրաստանի հետ դիվանագիտական հարաբերությունները վերականգնելուն։ Այս մասին IZ.RU թերթին տված հարցազրույցում հայտարարել է Ռուսաստանի Դաշնության արտաքին գործերի փոխնախարար Միխայիլ Գալուզինը։ Նրա խոսքով՝ Ռուսաստանի Դաշնությունը ցավում է, որ Թբիլիսին «երկխոսության վերականգնումը կապում է Աբխազիայի և Հարավային Օսիայի վերաբերյալ իր դիրքորոշման հետ»։
«2008 թվականի օգոստոսին ընդունված Աբխազիայի և Հարավային Օսիայի ինքնիշխանությունն ու անկախությունը ճանաչելու Ռուսաստանի Դաշնության որոշումը վերանայման ենթակա չէ, սակայն մենք պատրաստ ենք շարունակել համակողմանիորեն զարգացնել փոխշահավետ համագործակցությունը Վրաստանի հետ», - ասել է Գալուզինը։
Ապրիլի 11-ին Վրաստանի վարչապետ Իրակլի Կոբախիձեն հիշեցրել է, որ Թբիլիսին Մոսկվայի հետ հարաբերությունները պահպանում է «խաղաղ և պրագմատիկ» տոնով։
Հիշեցնենք՝ երկրների միջև դիվանագիտական հարաբերությունները դադարեցվել են Վրաստանի կողմից այն բանից հետո, երբ 2008 թվականի օգոստոսին Ռուսաստանը ճանաչել է Աբխազիայի և Հարավային Օսիայի ինքնիշխանությունը: Թբիլիսին այդ տարածքները համարում է օկուպացված:
