Եվրախորհրդարանից կոչ են արել դադարեցնել շփումները Էրդողանի հետ
Եվրախորհրդարանի գերմանացի պատգամավոր Միխայել Գալերը կոչ է արել դադարեցնել Եվրամիության շփումները Թուրքիայի նախագահ Ռեջեփ Թայիփ Էրդողանի հետ մինչև Ստամբուլի ընդդիմադիր քաղաքապետ Էքրեմ Իմամօղլուի ազատ արձակումը:
«Քանի դեռ Իմամօղլուն գտնվում է կալանքի տակ, մենք պետք է սառեցնենք ԵՄ-ի և անդամ երկրների շփումները քաղաքական մակարդակով։ Դա զգալիորեն կուժեղացներ ճնշումը Էրդողանի վրա», - ասել է Գալերը գերմանական Bild թերթին։
Միևնույն ժամանակ, քաղաքական գործիչը նշել է, որ չի պաշտպանում շփումների լիակատար խզումը, քանի որ Թուրքիան «շարունակում է մնալ ԵՄ կարևոր գործընկերը» միգրացիայի, անվտանգության, ինչպես նաև ուկրաինական հակամարտության հարցերում: Քաղաքական գործիչը նաև կոչ է արել ակտիվացնել շփումները թուրքական ընդդիմության հետ։
ԶԼՄ-ների տեղեկություններով՝ Թուրքիայի դատարանը մարտի 23-ին կոռուպցիայի մեջ կասկածվող Ստամբուլի քաղաքապետ Էքրեմ Իմամօղլուին կալանավորելու որոշում է կայացրել։ Ընդ որում, ահաբեկչության մասին երկրորդ գործի հետաքննության շրջանակներում ձերբակալման խնդրագիրը մերժվել է: Իմամօղլուի հետ միասին ձերբակալվել են քաղաքապետարանի մի շարք բարձրաստիճան պաշտոնյաներ, ընդհանուր առմամբ, դատական գործով անցնում է ավելի քան 90 մարդ: Իմամօղլուն կարող է բողոքարկել դատարանի կալանավորման որոշումը։ Ստամբուլի գլխավոր դատախազությունն, իր հերթին, մտադիր է բողոքարկել դատարանի որոշումը, որը մերժել է իմամօղլուի ձերբակալման միջնորդությունը ահաբեկչության գործով: Վերջնական որոշում կարող է կայացնել միայն Սահմանադրական դատարանը:
