Գալյանն` Ալիևի առաջ քաշած նախապայմանների մասին

Ադրբեջանի նախագահ Իլհամ Ալիևի՝ խաղաղության պայմանագրի ստորագրման համար առաջ քաշվող նախապայմանները, ես որպես նախապայման չեմ դիտարկում։ Այս մասին  Կառավարության նիստից հետո լրագրողների հետ ճեպազրույցում հայտարարել է ՀՀ արդարադատության նախարար Սրբուհի Գալյանը:

«Կառավարությունը պատրաստ է կնքել խաղաղության պայմանագիրը։ Հնչեցված մտքերը ես որպես նախապայման չեմ դիտարկում, կարծում եմ՝ կառավարությունն էլ չի դիտարկում։ Խաղաղությունն այլընտրանք չունի, և մեր գործողությունները պետք է միտված լինեն խաղաղության վերջնական հաստատմանը։ Թե ինչ կոնցեպտով պետք է առաջ շարժվենք դեպի խաղաղության պայմանագրի կնքումը, կարծում եմ, որ շուտով հանրությանը հայտնի կլինի»,- ասել է նախարարը:

Ապրիլի 2-ին Ալիևը կրկնել էր այն 2 պայմանները, որոնց կատարման դեպքում կստորագրի Հայաստանի հետ խաղաղության համաձայնագիր՝ ԵԱՀԿ Մինսկի խմբի վերացման անհրաժեշտություն և Հայաստանի Սահմանադրության փոփոխություն (Բաքուն պահանջում է Անկախության հռչակագրի դրույթները, որտեղ հիշատակվում է Լեռնային Ղարաբաղը, «հանել» Հայաստանի հիմնական օրենքից- խմբ.)։

Ինչ վերաբերում է Սահմանադրության փոփոխությանը, Գալյանը հիշեցրել է՝ իրենք աշխատում են Սահմանադրության նոր տեքստի վրա, մանրամասներ չի կարող ասել, բայց վստահեցնում է՝ տեքստը չի լինելու գաղտնի և ինչ-որ պահի հանրայնացվելու է, յուրաքանչյուր կետ ու նորմ քննարկվելու է հանրության հետ։

Գալյանի խոսքով՝ նոր սահմանադրության տեքստը կարող է լինել 8-10 ամսվա ընթացքում։