ՆԱՏՕ-ի գլխավոր քարտուղարը պատասխանել է Գրենլանդիայի նկատմամբ ԱՄՆ-ի հավակնությունների վերաբերյալ հարցին
ՆԱՏՕ-ի գլխավոր քարտուղար Մարկ Ռյուտեն ասել է, որ չի միջամտում Գրենլանդիայի նկատմամբ ԱՄՆ-ի հավակնությունների հարցին, քանի որ կարևոր է համարում ընդհանուր առմամբ Արկտիկայի անվտանգության քննարկումը։
«Որովհետև ես ուզում եմ, որ մենք կենտրոնանանք իրական խնդրի վրա՝ Արկտիկայի պաշտպանությանը: Դա շատ ավելի լայն խնդիր է, քան Գրենլանդիան»,- ասել է Ռյուտեն՝ պատասխանելով այն հարցին, թե ինչու է նա հեռանում թեմայից:
Նա հիշեցրել է, որ Դանիան, որը ներառում է Գրենլանդիան, արկտիկական երկրներից միայն մեկն է՝ ԱՄՆ-ի, Կանադայի, Իսլանդիայի, Նորվեգիայի և Շվեդիայի հետ միասին։ Միաժամանակ նա արկտիկական երկրների թվում չի նշել ոչ Ռուսաստանը, ոչ Ֆինլանդիան, որը ՆԱՏՕ-ին միացել է 2023 թվականին։
«Մենք պետք է լուրջ խնդիրներ լուծենք»,- ասել է Ռյուտեն։ Նրա խոսքով, այդ հարցերը վերաբերում են Ռուսաստանի և Չինաստանի գործողություններին Արկտիկայում։
ԱՄՆ նախագահ Դոնալդ Թրամփը ավելի վաղ հայտարարել էր, որ Գրենլանդիան «այսպես թե այնպես» կհայտնվի ԱՄՆ վերահսկողության տակ և կղզու բնակիչներին հարստություն է խոստացել, եթե նրանք միանան Միացյալ Նահանգներին։ ԱՄՆ նախագահը, մեկնաբանելով Գրենլանդիայի՝ ամերիկյան տարածք դառնալու հեռանկարը, մարտի 28-ին ասել է, որ Ամերիկային կղզին անհրաժեշտ է անվտանգության տեսանկյունից, և այստեղ ընտրություն չկա։ Թրամփը նաև նշել է, որ դանիական կղզին անհրաժեշտ է ԱՄՆ-ին միջազգային անվտանգությունն ապահովելու համար՝ մատնանշելով Չինաստանի և Ռուսաստանի կողմից ենթադրյալ ռիսկերը։
