Կենտրոնանալ է պետք այն հնարավորությունների վրա, որոնք կբացվեն ոչ միայն ՀՀ-ի և Ադրբեջանի, այլև ամբողջ տարածաշրջանի համար

«Շատ լավ նորություն է, որ համաձայնագիրը վերջանական տեսքի է բերվել։ Մեր կարծիքով, որքան շուտ ստորագրվի այդ փաստաթուղթը, այդքան լավ կլինի երկու երկրների, ինչպես նաև ամբողջ տարածաշրջանի համար»,-Հանրային հեռուստաընկերությանը տված հարցազրույցում ասել է Իրանի փոխարտգործնախարար Մաջիդ Թախտ Ռավանչին։

Նշելով որ, շատ արյունահեղություն, ատելություն և պատերազմ են տեսել տարածաշրջանում՝ իրանցի պաշտոնյան հայտարարել է, որ ժամանակն է վերջ տալ դրան։

Նա հորդորել է կենտրոնանալ այն հնարավորությունների վրա, որոնք կբացվեն ոչ միայն Հայաստանի և Ադրբեջանի, այլև ամբողջ տարածաշրջանի համար։

«Իրանը, որպես երկու երկրների բարեկամ, պատրաստ է բարեկամության ձեռք մեկնել Հայաստանին և Ադրբեջանին, չենք վարանի անել հնարավորը՝ Հայաստանի և Ադրբեջանի միջև հարաբերությունների բարելավմանը նպաստելու համար»,-ասել է Ռավանչին։

Փոխարտգործնախարարը արձանագրել է, որ երկու երկների միջև խնդիրներ են եղել, սակայն ռազմական ճանապարհով կարգավորում լինել չի կարող, այն միշտ ժամանակավոր լուծում է։

«Անցյալը անցյալում է։ Հիմա ժամանակն է, որ երկու ժողովուրդներն էլ տեսնեն, թե ինչ հնարավորություններ կան հարաբերությունները կարգավորելու համար»,-հայտարարրել է իրանցի պաշտոնյան և նկատել, որ տնտեսական դաշտում մեծ ներուժ կա և խաղաղության համաձայնագրի կնքման դեպքում դրանից կօգտվի ողջ տարածաշրջանը։