Իրանի միջուկային ենթակառուցվածքին հարվածելու սպառնալիքներն անընդունելի են. ՌԴ ԱԳՆ
Մոսկվան և Թեհրանը հայտարարել են, որ Իրանի միջուկային ենթակառուցվածքի դեմ ուղղված ռազմական սպառնալիքներն անընդունելի են։ Այս մասին հայտնել է ՌԴ ԱԳՆ-ն փոխնախարար Սերգեյ Ռյաբկովի և իրանցի գործընկեր Մաջիդ Թախտ-Ռավանչիի հանդիպման արդյունքներով։
Բանակցությունների ընթացքում կողմերն ընդգծել են միջուկային ծրագրի հետ կապված խնդիրների լուծման ժամանակ ուժի կիրառման անթույլատրելիությունը՝ նշելով, որ երրորդ երկրների կողմից Իրանի միջուկային օբյեկտները ռմբակոծելու սպառնալիքները կարող են հանգեցնել տարածաշրջանում ռադիոլոգիական և հումանիտար աղետների։ Կողմերը հաստատել են Չինաստանի հետ բանակցությունների շրջանակներում Իրանի միջուկային ծրագրի արդյունավետ լուծումների որոնումը շարունակելու իրենց մտադրությունը, որի հետ վերջին խորհրդակցությունները տեղի են ունեցել մարտի 14-ին Պեկինում: Հռչակվել է նաև միջուկային զենքի չտարածման պայմանագրին համապատասխան միջուկային էներգիան խաղաղ օգտագործելու Իրանի իրավունքը:
Ռուսաստանի դիվանագիտական գերատեսչությունը քննադատել է արեւմտյան երկրների գործողությունները՝ նրանց մեղադրելով Իրանի միջուկային ծրագրի շուրջ լարվածությունն արհեստականորեն սրելու մեջ։ Նշվում է, որ Արեւմուտքն անտեսում է ՄԱԿ-ի Անվտանգության խորհրդի 2231 բանաձեւի սեփական խախտումները եւ շահարկում է ՄԱԳԱՏԷ-ի ստուգողական հնարավորությունները քաղաքական նպատակներով։
