Եվրամիությունը ևս պետք է հայտնվի բանակցությունների սեղանի շուրջ․ Ռուբիո
Եվրամիությունը ևս պետք է «ինչ-որ պահի» հայտնվի բանակցությունների սեղանի շուրջ։ Այս մասին Սաուդյան Արաբիայում ռուսական պատվիրակության հետ բանակցություններից հետո հայտարարել է ԱՄՆ պետքարտուղար Մարկ Ռուբիոն։
«Որպեսզի հակամարտությունն ավարտվի, դրա բոլոր մասնակիցները պետք է համաձայն լինեն դրա լուծման հետ, այն պետք է ընդունելի լինի նրանց համար։ Եվրամիությունը ինչ-որ պահի պետք է նստի բանակցությունների սեղանի շուրջ, քանի որ նրանք ևս սահմանված պատժամիջոցներ ունեն»,- ասել է պետքարտուղարը։
Ավելի վաղ Ռուսաստանի և ԱՄՆ-ի պատվիրակությունները բանակցություններ են անցկացրել Ուկրաինայի հակամարտության շուրջ: Կողմերը քննարկել են երկկողմ հարաբերությունների կարգավորումը, նախագահներ Վլադիմիր Պուտինի և Դոնալդ Թրամփի բանակցությունների նախապատրաստումը և պայմանավորվել ապագայում հաշվի առնել միմյանց շահերը միջազգային ասպարեզում:
