Սիրիայում ձերբակալվել է Բաշար Ասադի ազգականը

Սիրիայում անվտանգության ուժերը ձերբակալել են բրիգադային գեներալ Ատեֆ Նաջիբին, ով երկրի նախկին նախագահ Բաշար ալ-Ասադի մոր հորեղբոր որդին է։ Այս մասին գրում է РИА Новости–ն:

Նշվում է, որ Ասադի ազգականի ձերբակալության մասին հայտնել է Լաթաքիա նահանգի ընդհանուր անվտանգության տնօրինության ղեկավար Մուստաֆա Քանիֆաթին։

«Լաթաքիա նահանգում Անվտանգության գլխավոր տնօրինության գործողության ընթացքում զինվորականների օգնությամբ ձերբակալվել է բրիգադիր Ատեֆ Նաջիբը, ով ծառայում էր որպես Դարաայի քաղաքական անվտանգության վարչության պետ»,- նրա խոսքերն է մեջբերում Al Watan թերթը։

Քանիֆաթին պնդում է, որ Նաջիբը «հանցագործություններ է կատարել սիրիացի ժողովրդի դեմ»: Այս կապակցությամբ նա արդեն «հանձնվել է պատկան մարմիններին», որոնք «պատասխանատվության կենթարկեն նրան»։