Հունվարի 19-ին TikTok-ը ԱՄՆ-ում կդադարի թարմացվել
TikTok-ի և նրա 170 միլիոն ամերիկացի օգտատերերի ճակատագիրը կորոշվի այս շաբաթ։ 2024 թվականի ապրիլին Ջո Բայդենի կողմից ստորագրված օրենքի համաձայն՝ սոցցանցը կարգելափակվի ԱՄՆ-ում, եթե ByteDance-ը մինչև հունվարի 19-ը չի վաճառի իր ամերիկյան բիզնեսը։
Վերջնաժամկետը կարող է հետաձգվել 90 օրով՝ պայմանով, որ TikTok-ը «զգալի արդյունքների հասնի բիզնեսի վաճառքի հարցում»։
Վաշինգտոնը պնդում է, որ TikTok-ը «ազգային անվտանգության սպառնալիք է», քանի որ Չինաստանը կարող է օգտագործել սոցիալական ցանցը՝ ԱՄՆ օգտատերերից անձնական տվյալներ ստանալու համար: Սպիտակ տան ազգային անվտանգության խորհրդի ռազմավարական հաղորդակցության համակարգող Ջոն Քիրբին ասել է, որ դա «պետք է մտահոգի յուրաքանչյուր ամերիկացու».
«Մենք չգիտենք, թե ինչ կարող են անել ByteDance-ը և Չինաստանի Կոմունիստական կուսակցությունը հավելվածի օգտատերերից հավաքած տեղեկատվության հետ»: Բացի այդ, իշխանությունները վախենում են, որ TikTok-ը կարող է օգտագործել առաջարկությունների հոսքը «ապատեղեկատվություն տարածելու համար»:
