Գտնվել է հոգեպես անհավասարակշիռ վիճակում. պարզաբանում Արմավիրի ՔԿՀ-ից

ՀՀ քրեակատարողական ծառայությունը հայտնել է, թե ինչ պատճառներով են «Արմավիր» ՔԿՀ–ի կալանավոր Ս. Մ.–ն և «Դատապարտյալների հիվանդանոց» ՔԿՀ–ի դատապարտյալ Հ. Պ.–ն վնասել իրենց։

Քրեակատարողական ծառայությունից հայտնում են, որ կալանավոր Ս. Մ.-ն գտնվել է հոգեպես անհավասարակշիռ վիճակում:

«Տեղում Ս. Մ.-ին ցուցաբերվել է բուժօգնություն, այնուհետև շտապօգնություն է կանչվել և տեղափոխվել է «Էջմիածին» բժշկական կենտրոն, իսկ ժամը 20:30-ի սահմաններում` «1-ին համալսարանական» բժշկական կենտրոն: Համապատասխան բուժօգնություն ստանալուց հետո նույն օրը` ժամը 22:40-ի սահմաններում, վերադարձվել է քրեակատարողական հիմնարկ»,– ասված է հաղորդագրությունում։

Դատապարտյալ Հ. Պ.-ն էլ բանավոր հայտարարել է, որ ինքնավնասում է կատարել կրծքավանդակի շրջանում ունեցած ցավերին չդիմանալու պատճառով։

Նրան նույնպես տեղում ցուցաբերվել է բուժօգնություն, այնուհետև շտապօգնություն է կանչվել: Ժամը 14:10-ի սահմաններում տեղափոխվել է քաղաքային հիվանդանոց, ստացել համապատասխան բուժօգնություն և վերադարձվել է քրեակատարողական հիմնարկ:

Հավելենք, որ երկու դեպքն էլ տեղի է ունեցել հունվարի 6-ին։ ՀՀ ԱՆ «Արմավիր» ՔԿՀ–ի կալանավորված անձ Ս. Մ.-ն ժամը 18։20-ի սահմաններում ածելիով կտրել է լեզուն։ «Դատապարտյալների հիվանդանոց» ՔԿՀ–ի դատապարտյալ Հ. Պ.-ն էլ ածելիի միջոցով ինքնավնասում է կատարել ձախ նախաբազկի շրջանում: