Զուրաբիշվիլին ստիպված կլինի թոշակի անցնել. Վրաստանի վարչապետ

Վրաստանի նախագահ Սալոմե Զուրաբիշվիլին ստիպված կլինի թոշակի անցնել դեկտեմբերի 29-ին պետության նոր ղեկավարի երդմնակալությունից հետո՝ չնայած մնալու իր ցանկությանը։ Այդ մասին ադրբեջանական Real TV հեռուստաալիքին տված հարցազրույցում հայտարարել է Վրաստանի վարչապետ Իրակլի Կոբախիձեն, գրում է ТАСС–ը։

«Սալոմե Զուրաբիշվիլին, ցավոք, փորձեց վնասել մեր երկրի ազգային շահերին, հատկապես վերջին երեք տարիներին սա տխուր երևույթ է, երբ նախագահը ուղղակիորեն հակադրվում է սեփական երկրի ազգային շահերին, թեև, փառք Աստծո, Վրաստանը եղել և մնում է։ Համապատասխանաբար, նախագահը չի կարողացել շատ բան կործանել մեր երկրում: Դեկտեմբերի 29-ին վերջապես կլրանա նրա պաշտոնավարման ժամկետը, և նա, բնականաբար, պետք է գնա թոշակի»,– ասել է նա։

Դեկտեմբերի 14-ին Վրաստանում տեղի կունենան նախագահական ընտրություններ։ Առաջին անգամ նոր նախագահին ընտրելու է ընտրական կոլեգիան, այլ ոչ թե երկրի քաղաքացիները։ Միակ թեկնածուն իշխող «Վրացական երազանք-Ժողովրդավարական Վրաստան» կուսակցության ներկայացուցիչ, նախկին պատգամավոր և նախկին ֆուտբոլիստ Միխեիլ Կավելաշվիլին է։ Երդմնակալությունը տեղի կունենա դեկտեմբերի 29-ին։

Զուրաբիշվիլին չի ճանաչում հոկտեմբերի 26-ին կայացած խորհրդարանական ընտրությունների արդյունքները և կարծում է, որ նախագահական ընտրությունները նույնպես ոչ լեգիտիմ են։ Նա հայտարարում է, որ մնալու է նախագահի պաշտոնում, չնայած նրան, որ երկրի նոր ղեկավար է ընտրվելու։