Սիրիան նոր վարչապետ ունի. ով է նա

Սիրիայի անցումային կառավարության ղեկավար է նշանակվել Իդլիբի զարգացման նախկին նախարար Մուհամմադ ալ Բաշիրը։ Նա արդեն հանդիպումներ է ունեցել Ասադի ժամանակաշրջանի նախկին վարչապետի հետ՝ նոր կաբինետ ձևավորելու համար։

Մուհամմադ ալ-Բաշիրը կնշանակվի Սիրիայի անցումային կառավարության ղեկավար: Այս մասին հայտնում է Al Jazeera հեռուստաալիքը՝ հղում անելով աղբյուրներին։

Սպասվում է, որ Ալ-Բաշիրին հանձնարարվելու է նոր կառավարություն ձևավորել, որը կկառավարի անցումը:

Հիշեցնենք, որ նոյեմբերի 27-ին զինված ընդդիմադիր խմբերը Հալեպ և Իդլիբ նահանգներում լայնածավալ հարձակում են սկսել սիրիական բանակի դեմ։ Դեկտեմբերի 7-ի երեկոյան նրանք վերահսկողության տակ են վերցրել մի քանի առանցքային քաղաքներ, այդ թվում՝ Հալեպը, Համեն, Դերաան և Հոմսը։ Արդեն դեկտեմբերի 8-ին ընդդիմության ուժերը մտել են Դամասկոս, որտեղից Սիրիայի կառավարական զորքերը ստիպված են եղել նահանջել։