18+ՏԵՍԱՆՅՈՒԹ. Կենդանու նկատմամբ դաժանության նոր՝ աղմկահարույց դեպք
Համացանցում, ինչպես նաև Ֆեյսբուքի կենդանասերների տարբեր խմբերում հերթական ահասարսուռ տեսանյութն է տարածվում:
Ինչ որ մեկը մեքենան վարում է ճանապարհով վազող շների հետևից, որից հետո գցում անիվների տակ: Թե որ ճանապարհն է պարզ չէ: Կենդանասերները գտել են թե՛ մեքենան, թե՛ մեքենայի վարորդին:
Ըստ Tik Tok հարթակի, վերջինս Սամո Ավետիսյան անունով օգտատերն է, որի էջում էլ հենց հրապարակվել է տեսանյութը: 
Արդեն ՖԲ հարթակի համաձայն, նա Հայաստանի Արարատ քաղաքից է:
Հիշեցնենք, որ կենդանիների հանդեպ դաժան վերաբերմունքը քրեորեն պատժելի է:
ՀՀ քրեական օրենսգրքի 307-րդ հոդվածի 1-ին կետի` կենդանու նկատմամբ դաժան վերաբերմունքը պատժվում է տուգանքով՝ առավելագույնը նվազագույն աշխատավարձի քսանապատիկի չափով կամ հանրային աշխատանքներով՝ ութսունից հարյուր հիսուն ժամ տևողությամբ, կամ կարճաժամկետ ազատազրկմամբ՝ առավելագույնը երկու ամիս ժամկետով, կամ ազատազրկմամբ՝ առավելագույնը երկու տարի ժամկետով:
Կենդանիների նկատմամբ դաժան վերաբերմունքի դեպքերով 2024 թ. հունվարի 1-ից մինչ նոյեմբերի վերջ ՆԳՆ ոստիկանության օպերատիվ կառավարման կենտրոնում ստացվել է 57 հաղորդում, 2023 թ. նույն ժամանակահատվածում՝ 46:
Չնայած այս օրենքի, կենդանիների հանդեպ դաժան վերաբերմունք դրսևորած անձինք այդպես էլ պատիժ չեն կրում ամբողջ խստությամբ: Կամ գործը վարույթ չի ընդունվում, կամ տարիներով այն քննվում է տարբեր դատարաններում: Վճարում են տուգանքը ու շարունակում հանգիստ խղճով ապրել, ապացուցելով ևս մեկ անգամ, որ ամենադաժան կենդանին մարդն է:
