Ադրբեջանցի դեսպանը սպառնացել է սպանել ԵՄ–ում ՀՀ դեսպանին. Politico
Հայաստանի դեսպանությունը պաշտոնական բողոք է ուղարկել Բրյուսելի այլ դիվանագիտական ներկայացուցչություններին այն բանից հետո, երբ դեսպանն ասել է, որ սպանության սպառնալիքներ է ստացել իր ադրբեջանցի գործընկերոջից: Այս մասին գրում է POLITICO–ն:
Ենթադրվում է, որ Հայաստանի դեսպան Տիգրան Բալայանը ենթարկվել է «բանավոր հարձակումների և ահաբեկման» Ադրբեջանի դեսպան Վագիֆ Սադիկովի կողմից, ով «բացահայտ սպառնալիքներ է հայտնել նրա կյանքի դեմ»։
Հաղորդվում է, որ միջադեպը տեղի է ունեցել Բրյուսելի Tangla հյուրանոցում ընդունելության ժամանակ, որը կազմակերպել էր Թուրքիայի դեսպանությունը՝ ի պատիվ երկրի ազգային տոնի: Ենթադրվում է, որ դա Անկարայի կողմից կազմակերպված առաջին միջոցառումն է, որին հրավիրվել է Հայաստանի դեսպանությունը՝ 2020 թվականին երկրի և Թուրքիայի մերձավոր դաշնակից Ադրբեջանի միջև պատերազմից հետո:
Միևնույն ժամանակ POLITICO-ի հետ զրույցում Սադիկովը հերքել է, որ նման միջադեպ եղել է:
