Պեսկովը Google-ի դեմ 2 ունդեցիլիոն հայցի մասին
ՌԴ նախագահի մամուլի քարտուղար Դմիտրի Պեսկովը մեկնաբանել է ռուսական ընկերությունների՝ ամերիկյան Google տեխնոլոգիական ընկերության դեմ 2 ունդեցիլիոն (2,000,000,000,000,000,000,000,000,000,000,000,000) ռուբլու հայցը։ Կրեմլի խոսնակը կարծում է, որ այդ գումարը «լի է սիմվոլիզմով»։ Նրա կարծիքով, ամենալավ բանը, որ կարող է անել ամերիկյան կորպորացիան, իրավիճակը շտկելն է, գրում է kommersant.ru-ն։
«Չնայած դա կոնկրետ ձևակերպված գումար է, ես նույնիսկ չեմ կարող արտասանել այս թիվը, բայց այն ավելի շուտ լի է սիմվոլիզմով։ Այս պահանջներն արտացոլում են Google-ի դեմ մեր ալիքների պահանջների էությունը»,- ասաց պարոն Պեսկովը
ՌԴ նախագահի մամուլի քարտուղարը նշել է, որ ամերիկյան կորպորացիան չպետք է սահմանափակի ռուսական հեռարձակողների գործողությունները։
«Իրականում սա պետք է պատճառ հանդիսանա, որ Google-ի ղեկավարությունը ուշադրություն դարձնի և շտկի իրավիճակը: Սա լավագույնն է, որ ընկերությունը կարող է անել»,- հավելեց նա:
Ռուսական հեռուստաընկերությունները Google-ից պահանջել են 2 ունդեցիլիոն ռուբլի՝ YouTube-ում իրենց օգտահաշիվների արգելափակման հետ կապված։
ՌԴ-ում դատարանը Google-ին պարտավորեցրել է ապաարգելափակել օգտահաշիվները: Եթե դատարանի որոշումը չկատարվի դրա ուժի մեջ մտնելու օրվանից 9 ամսվա ընթացքում, ապա յուրաքանչյուր չկատարման օրվա համար կգանձվի 100,000 ռուբլի տուգանք:
2022 թվականի մարտին Google-ը որոշել է արգելափակել ռուսական ալիքները YouTube-ում։ Ընկերությունը որպես դրա պատճառ նշել է այս ԶԼՄ-ների՝ կառավարության կողմից ֆինանսավորումը, ինչպես նաև Ուկրաինայում պատերազմի մասին նյութերի հրապարակումը:
