Զախարովան անդրադարձել է Մհեր Գրիգորյանի հայտարարությանը

ՌԴ ԱԳՆ խոսնակ Մարիա Զախարովան անդրադարձել է ՀՀ փոխվարչապետ Մհեր Գրիգորյանի հայտարարությանը, թե տարածաշրջանային կոմունիկացիաների ապաշրջափակման հարցով Մոսկվայի, Բաքվի և Երևանի եռակողմ հանձնաժողովն ընդհատել է իր նիստերը, քանի որ որոշ հարցերի շուրջ կոնսենսուս չկա: Հարցին՝ Մոսկվան դեռ չի՞ կորցրել տարածաշրջանում կոմունիկացիաների բացման հասնելու հույսը, Զախարովան պատասխանել է. «Այստեղ խոսքը հույսի կամ դրա բացակայության մասին չէ, այլ Բաքվին ու Երևանին ձեռնտու փոխընդունելի լուծում գտնելու։ Ռուսաստանի, Ադրբեջանի և Հայաստանի փոխվարչապետների համանախագահությամբ եռակողմ աշխատանքային խմբի շրջանակներում ակտիվ աշխատել են այդ ուղղությամբ: Պատրաստ ենք այսուհետ ևս համակողմանի աջակցություն ցուցաբերել գործընկերներին»։

Ըստ Զախարովայի՝ տրանսպորտային հաղորդակցությունների ապաշրջափակումից կշահի տարածաշրջանն ընդհանուր առմամբ։ Նա ուշադրություն է հրավիրել ՌԴ փոխվարչապետ Օվերչուկի՝ վերջերս արած հայտարարությանը, թե Հվ․ Կովկասում տնտեսական և տրանսպորտային միջանցքների ապաշրջափակումը հնարավոր է միայն Ռուսաստանի մասնակցությամբ․

«Աշխատում ենք այդ ուղղությամբ»,- եզրափակել է Զախարովան։