«Բայց ինչու պետք է չշտապենք». Ռուբինյան
Մենք ամեն ինչ անում ենք, որ խաղաղության պայմանագիրը օր առաջ կնքվի, ամեն ինչ անում ենք, որ ապաշրջափակումը օր առաջ տեղի ունենա: Այս մասին, այսօր՝ հոկտեմբերի 24-ին, ԱԺ-ում լրագրողների հետ զրույցում նշեց ԱԺ փոխխոսնակ Ռուբեն Ռուբինյանը:
Նա հիշեցրեց, որ վերջերս Ստամբուլում հանդիպեցին Հայաստանի եւ Ադրբեջանի ԱԳ նախարարները եւ ասաց. «Հիմա փորձ է արվում խաղաղության պայմանագրի ստորագրումը դարձնել հնարավոր եւ մենք այդ ուղղությամբ անում ենք ամեն ինչ»:
Հարցին՝ հնարավո՞ր է, որ ինչ-որ փուլում բանակցություններում միջնորդի անհրաժեշտություն ծագի, Ռուբինյանը պատասխանեց. «Ամեն ինչ էլ հնարավոր է, բայց այս փուլում բանակցությունները երկկողմ են ընթանում: Հենց սկզբից էլ ԱԳ նախարարների մակարդակով բանակցությունները ձեւաչափը եղել է երկկողմ: Բուն բանակցությունների ժամանակ կողմերը սենյակում մենակ են եղել: Ես չեմ կարող բացառել, որ կարող է ինչ-որ ժամանակ փոխվել ֆորմատը, բայց մինչ այս պահը այդպես է եղել: Հարցը պրագմատիզմի եւ պրակտիկության մեջ է»:
Ինչ վերաբերում է դիտարկմանը, որ Հայաստանը կարծես շտապում է կանոնակարգը վավերացնելու հարցում, Ռուբինյանն արձագանքեց. «Բայց ինչու պետք է չշտապենք կամ չուզենանք, որ լավ բանը շուտ լինի»:
