Ուկրաինային դաժան ձմեռ է սպասվում․ WSJ

Ուկրաինայի իրավիճակն առաջիկա ձմռանը կարող է վատթարանալ Արևմուտքի կողմից զենքի մատակարարումների դանդաղեցման ֆոնին։ Այս մասին գրում է The Wall Street Journal-ը:

«Արևմտյան զենքի մատակարարման սահմանափակման և դանդաղեցման պայմաններում Ուկրաինային դաժան ձմեռ է սպասվում։ Ուկրաինայի զինվորականները, որոնց գերազանցում են քանակով և սպառազինությամբ, դանդաղ, բայց անշեղորեն կորցնում են դիրքերը գլխավոր արևելյան ճակատում», - ասվում է հրապարակման մեջ։

Պարբերականը նշում է, որ ռուսական սպառազինությունը գերազանցում Է Ուկրաինայի ՀՕՊ-ի հնարավորությունները, հարվածները հանգեցնում են ենթակառուցվածքի օբյեկտների անջատմանը, և ձմռանը իրավիճակը «կարող է սրվել»: Միևնույն ժամանակ, Ինչպես գրում է թերթը՝ վկայակոչելով ուկրաինացի պաշտոնյաների և զինվորականների գնահատականը, Արևմուտքն «անբավարար աջակցություն» է ցուցաբերում Կիևին՝ ռազմաճակատում իրավիճակի զգալի փոփոխության համար, չնայած ԱՄՆ նախագահ Ջո Բայդենը և այլ առաջնորդներ հայտարարել են, որ ցանկանում են օգնել Ուկրաինային հաղթել հակամարտությունում:

Ավելի վաղ թերթը գրել էր, որ Բայդենի վարչակազմը, վախենալով իրավիճակի հետագա սրումից, հրաժարվել է հաստատել Ուկրաինայի նախագահ Վլադիմիր Զելենսկու «հաղթանակի պլանը», որի շրջանակներում Ուկրաինայի առաջնորդը խնդրել է իրեն ավելի շատ զենք և անվտանգության երաշխիքներ տրամադրել՝ «Ուկրաինայի համար բարենպաստ պայմաններով» հակամարտության ավարտին հասնելու համար: