Ուկրաինացի օլիգարխ Իգոր Կոլոմոյսկին զրկվել է Կիպրոսի քաղաքացիությունից
Կիպրոսի կառավարությունը ուկրաինացի օլիգարխ Իգոր Կոլոմոյսկուն զրկել է քաղաքացիությունից։
Այս մասին հայտնում են կիպրական լրատվամիջոցները։
Իշխանությունների որոշման մեջ ասվում է, որ Կոլոմոյսկին քաղաքացիություն ստանալիս թաքցրել է իր կենսագրության որոշ փաստեր, իսկ նրան քաղաքացիություն տալը վտանգ է ստեղծել և շարունակում է ստեղծել հանրապետության հեղինակության համար։
Ներգաղթի վարչությունը, մասնավորապես, նշում է, որ 2010 թվականին քաղաքացիություն ստանալու դիմումում Կոլոմոյսկին թաքցրել է, որ երկու տարի առաջ Ռուսաստանում իր դեմ քրեական գործ է հարուցվել՝ կապված հարկերից խուսափելու հետ։ Նրա դեմ նմանատիպ մեղադրանք է առաջադրվել Ուկրաինայում։
Հիշեցնենք, որ այս պահին Իգոր Կոլոմոյսկին գտնվում է Ուկրաինայում կալանքի տակ։ Նա մեղադրվում է փողերի լվացման, 2013-2020 թվականներին արտերկիր մոտ 12,5 միլիարդ դոլար փոխանցելու, Privatbank-ից 233 միլիոն դոլար յուրացնելու և 2003 թվականին պատվիրված սպանություն կազմակերպելու մեջ:
