Զելենսկին վերջնաժամկետ է դրել նախարարների առջև
Ուկրաինայի նախագահ Վլադիմիր Զելենսկին նախարարների կաբինետում կադրային փոփոխություններից հետո ասել է, որ նոր նախարարները պետք է կոնկրետ արդյունքներ ցույց տան աշնանը։ Այս մասին Զելենսկին ասել է իր Telegram ալիքում հրապարակված տեսաուղերձում։
Նրա խոսքով, կան «տասնյակ շատ կոնկրետ խնդիրներ», այդ թվում՝ մեծացնել Ուկրաինային զենքի մատակարարումը արևմտյան գործընկերներից: «Շատ կարևոր է, որ պետական կառույցներն այժմ հնարավորինս ակտիվ աշխատեն, նույնիսկ ավելի ակտիվ, քան նախկինում, բոլոր մակարդակներում»,- հավելել է նա:
Ավելի վաղ ուկրաինական լրատվամիջոցները հայտնել էին, որ Զելենսկին դժգոհ է այն փաստից, որ հինգշաբթի օրը պաշտոնանկ արված Ուկրաինայի ԱԳ նախարար Դմիտրի Կուլեբան անհրաժեշտ հաջողությունների չի հասել զենքի մատակարարման և Ռուսաստանի խորքերը հարվածների համար դրա օգտագործման հարցում։ Նախագահական «Ժողովրդական ծառայող» կուսակցության խմբակցության նիստում Զելենսկին ասել է, որ Կուլեբան «էներգիայի պակաս ունի»: Թեև ինքը՝ Կուլեբան, դժգոհում էր, որ «գլուխը պատին է խփում»՝ Կիևի համար զենք ստանալու ակնկալիքով։
Զելենսկին իր TG ալիքով հայտնել է նաև Ֆրանսիայի նախագահ Էմանուել Մակրոնի հետ «երկար» զրույցի մասին։
«Մենք քննարկել ենք պաշտպանական համագործակցության շարունակությունը, Ֆրանսիայից ռազմական օգնության նոր փաթեթի պատրաստումը, ինչպես նաև որոշ տեսակի զենքերի համատեղ արտադրության հնարավորությունը։ Ես ևս մեկ անգամ ընդգծեցի. մեզ շտապ անհրաժեշտ է մեր գործընկերների թույլտվությունը՝ հարվածելու այն օդանավակայաններին, որտեղից օդ են բարձրացվում կառավարվող ավիացիոն ռումբերի կրիչներ և հրթիռներ, ուստի մենք հույս ունենք դաշնակիցների միասնության վրա այս հարցում»,- ասել է Ուկրաինայի նախագահը։
