Բելառուսի ռազմաօդային ուժերը կործանիչ են օդ բարձրացրել

Օգոստոսի 29-ին Ուկրաինայի քաղաքների վրա ռուսական զանգվածային հարձակման ժամանակ ռուսական «Շահեդ» անօդաչու թռչող սարքը կրկին մտել է Բելառուսի տարածք։ Ըստ «Բելառուսկի գայուն» հեռուստաալիքի՝ այն բանից հետո, երբ անօդաչու թռչող սարքը մտել է երկրի օդային տարածք, Բելառուսի ռազմաօդային ուժերը կործանիչ են օդ բարձրացրել, որը «մոտ 20 րոպե հետապնդել ներխուժողին»:

Հեռուստաալիքը նշում է՝ առավոտյան ժամը չորսի մոտ անօդաչու թռչող սարքը կարող էր խոցվել Գոմելի շրջանի Ելսկի թաղամասում. տեղի բնակիչները լսել են առնվազն երկու պայթյուն և երկնքում վառ բռնկում են նկատել: Եթե ​​տեղեկությունը հաստատվի, ապա սա կլինի առաջին դեպքը, երբ բելառուսական ռազմաօդային ուժերի կործանիչը կրակ է բացում իրական ռազմական թիրախի վրա։

Սա առաջին դեպքը չէ, երբ «Շահեդները», որոնք Ռուսաստանը օգտագործում է Ուկրաինայի վրա հարձակվելու համար, թռչում են Բելառուսի տարածք։