Հաղորդվում է ՌԴ տարածքում բնակավայրեր գրավելու և դիրքերը ամրապնդելու մասին

Կուրսկի շրջանում մարտերը շարունակվում են: Ուկրաինական աղբյուրները հայտնում են, որ Ուկրաինայի զինված ուժերն առաջ են շարժվել, մի շարք ռուսական բնակավայրեր գրավել և ռուս զինծառայողների գերի վերցրել:

Նաև նշվում է, որ ուկրաինացի զինվորականներն ամրապնդում են դիրքերը Սուջա քաղաքի շուրջ։

Արտակարգ իրավիճակների նախարարություը հայտարարել է, որ Կուրսկի մարզում տեղի ունեցողը ճանաչվել է դաշնային մակարդակում արտակարգ իրավիճակ։

Ռուսաստանի ՊՆ-ն, սակայն, հայտարարում է, որ ուկրաինական զինված ուժերին հարվածներ են հասցվում, նրանց առաջխաղացումը կասեցվում է: Գերատեսչությունը հայտնել է, որ գիշերը ուկրաինական տասնյակ անօդաչու թռչող սարքերով թիրախավորվել են Բելգորոդի, Բրյանսկի, Լիպեցկի, Կուրսկի, Վորոնեժի, Օրյոլի շրջանները:

Լիպեցկի շրջանի մի շարք բնակավայրերում տարհանում է հայտարարվել, հայտնի է խաղաղ բնակչության շրջանում տուժածների մասին:

Չորս դրոն էլ հարվածել է Շեբեկինոյի բազմաբնակարան շենքերից մեկին, հրդեհ է բռնկվել մի քանի բնակարաններում։ Այս մասին հայտնել է Բելգորոդի մարզի նահանգապետ Վյաչեսլավ Գլադկովը:

«Աղետների կենտրոնի տվյալներով՝ բժշկական օգնության համար ոչ ոք չի դիմել»,- նշել է Գլադկովը։