Ինչ հաղորդագրություն է թողել Թրամփի վրա կրակողը մահափորձից առաջ

Հանրապետական կուսակցությունից ԱՄՆ նախագահի թեկնածու Դոնալդ Թրամփի վրա Փենսիլվանիա նահանգում հանրահավաքի ժամանակ կրակած Թոմաս Մեթյու Քրուքսը մահափորձից առաջ հաղորդագրություն է թողել Steam խաղային հարթակում: Այս մասին հայտնել է Fox News հեռուստաալիքը։

«Steam հարթակում, որտեղ խաղացողները գնում են խաղեր և շփվում, Քրուքսը գրել է. «Հուլիսի 13-ին տեղի կունենա իմ պրեմիերան, հետևեք իրադարձությունների զարգացմանը», - նշել Է հեռուստաալիքը:

Ֆոքս Նյուզ-ի տեղեկություններով՝ ԱՄՆ-ի Գաղտնի ծառայությունը տղամարդու տարօրինակ պահվածքի մասին հաղորդագրություններ է ստացել հրաձգությունից ավելի քան մեկ ժամ առաջ: Քրուքսին կասկածելի են ճանաչել, քանի որ նրա մոտ նկատել են հեռաչափն ու ուսապարկը։

Հուլիսի 13-ին մահափորձ է տեղի ունեցել Դոնալդ Թրամփի դեմ։ Քաղաքական գործչի վրա մի քանի անգամ կրակել են, նրան արյունոտ ականջով տարել են բեմից և հոսպիտալացրել։ Օգնություն ցուցաբերելուց հետո Թրամփին դուրս են գրել հիվանդանոցից։