ՏԵՍԱՆՅՈՒԹ. Լայնածավալ հրթիռային հարձակում Ուկրաինայի վրա. Կիևում վնասվել է մանկական հիվանդանոց. կան զոհեր

Ուկրաինայի ռազմաօդային ուժերը առաջին հրթիռի արձակման մասին զգուշացվել են ժամը 09:51-ին։ Այնուհետև Կիևի քաղաքային ռազմական վարչությունից նշել են, որ տարածաշրջանում գործում են հակաօդային պաշտպանության ուժեր։

Կիևի քաղաքային ռազմական վարչությունը նաև նշել է, որ Կիևի վրա հրթիռային հարձակման հետևանքով բեկորներ են ընկել Սոլոմենսկի, Դնեպրովսկի, Դառնիցկի, Սվյատոշինսկի, Դեսնյանսկի, Շևչենկովսկի և Գոլոսեևսկի շրջաններում։ Հարվածի հետևանքով տուժել են ավտոտնակներ, առանձնատուն, Օխմադիտի մանկական հիվանդանոցը, բռնկվել են նաև հրդեհներ։

Մայրաքաղաքի քաղաքապետ Վիտալի Կլիչկոյի խոսքով՝ այժմ հայտնի է ինը վիրավորի մասին։ Նրանցից վեցը հոսպիտալացվել են։ Ավելի ուշ հայտնի է դարձել, որ հինգ մարդ մահացել է։

Ուկրաինայի նախագահ Վլադիմիր Զելենսկին հայտարարել է, որ ընդհանուր առմամբ ռուսական բանակը տարբեր տեսակի 40 հրթիռ է արձակել Ուկրաինայի ուղղությամբ։