«Մենք փորձելու ենք աջակցել հայ ռազմագերիների վերադարձի հարցում»․ Ջո Վիլսոն

«Մենք միջնորդ ենք ուզում լինել, օգնում ենք հարթել, ձևավորել այն սկզբունքները, որոնք թույլ կտան ստորագրել համաձայնագիրը։ Դրանից հետո կլինեն նաև այլ հարցեր, որոնցով պետք է զբաղվել»,- լրագրողների հարցին՝ երբ Ադրբեջանում խաղաղության գործընթացի հետ կապված տարբեր բանակցություններ են լինում, արդյոք սեղանին դնո՞ւմ եք այն հարցը, թե ինչու է Ադրբեջանը ձգձգում խաղաղության պայմանագրի ստորագրումը և այդ պայմանագրի՝ Ձեր պատկերացումը ո՞րն է, առանց գերիների վերադարձի և Ադրբեջանի՝ ՀՀ-ի օկուպացված տարածքներից դուրս գալու պատկերացնո՞ւմ եք այդ պայմանագրի ստորագրումը, ՀՀ ԱԺ-ում հրավիրված մամուլի ասուլիսի ժամանակ այսպես պատասխանեց ԱՄՆ սենատոր Ռոջեր Ուիքերը։

Նա շեշտեց՝ ԱՄՆ-ի դիրքորոշումը հետևյալն է․ «Մենք բարձր ենք գնահատում այն անկեղծ ցանկությունը, ջանքերը, որոնք դրսևորվում են ՀՀ-ի կողմից համաձայնություն ձեռք բերելու և տևական խաղաղության հասնելու ուղղությամբ։ Մեր վերջնական նպատակն է, որ ողջ տարածաշրջանում լինի խաղաղություն և անվտանգություն ու հարևանների իրավունքների նկատմամբ հարգանք։

Հելսինկյան հանձնաժողովի նախագահ Ջո Վիլսոնն էլ շեշտեց՝ պաշտպանելու են ՀՀ-ի ինքնիշխանությունը, տարածքային ամբողջականությունը և ՀՀ-ի սահմանների անխախտելիությունը․ «Մենք փորձելու ենք աջակցել հայ ռազմագերիների վերադարձի հարցում։ Դուք հարյուրավոր տարիներ նման իրավիճակների բախվել եք և հաջողված դուրս եկել այդ իրավիճակից։ Կարծում եմ՝ ի վերջո կլինի կայունություն Հարավային Կովկասում»։

ԱՄՆ Սենատի Արտաքին հարաբերությունների հանձնաժողովի նախագահ, սենատոր Բին Քարդենը նշեց՝ խաղաղության համաձայնագրով պետք է ապահովվի, որ ՀՀ քաղաքացիները վստահ լինեն՝ սահմանների նկատմամբ հարձակումներ չկան և հանգիստ ու խաղաղ կարող են ապրել։ Սա նաև հարաբերությունների կարգավորում է։