44-ամյա Կարապետը ցիստեռնի վարորդն է եղել. ՌԴ-ից գազը բերել են գիշերը. մանրամասներ

Երեկվա գազալցակայանի պայթյունից հետո այրվածքներ ստացած 44-ամյա Կարապետ Սիմոնյանն այս պահին վերակենդանացման բաժանմունքում է:

Նրա կինը լրագրողների հետ զրույցում պատմեց, որ Կարապետը գազ մատակարարող ցիստեռնի վարորդն է եղել:

«Ռուսաստանից գազը բերել են գիշերը: Գիշերը ուշ են իմացել հարազատները դեպքի մասին, երբ արդեն հիվանդանոցում է եղել»,-ասաց նա՝ հավելելով, որ իրենք Արագածոտնի մարզից են:

Կարապետ Սիմոնյանի վիճակը ծայրահեղ ծանր է:

Հիշեցնենք` հունիսի 6-ին` ժամը 23:14-ին, Ճգնաժամային կառավարման ազգային կենտրոնն ահազանգ է ստացել, որ Երևան-Սևան ավտոճանապարհին՝ գազալցակայանում, տեղի է ունեցել պայթյուն՝ հրդեհի բռնկմամբ։ Ավելի ուշ պարզվեց, որ պայթյունը եղել է Երևան-Սևան ավտոճանապարհի թիվ 6/1 հասցեում՝ «Գազ օիլ» ՍՊԸ-ի գազաբենզալցակայանում։ Պայթյունի հետևանքով կա 7 տուժած, որոնցից 2–ի վիճակը ծայրահեղ ծանր է։