Զանգվածային ծեծկռտուք Արարատի մարզում. ավելի քան 10 քաղաքացի դիմել է հիվանդանոց, կան ձերբակալվածներ

Արարատի մարզում տեղի է ունեցել ծեծկռտուք և արտակարգ պատահար, որի հետևանքով կան ձերբակալված անձինք:

Օգոստոսի 9-ին՝ ժամը 00։30-ի սահմաններում, ՀՀ ՆԳՆ ոստիկանության համայնքային ոստիկանության գլխավոր վարչության Մասիսի բաժին ահազանգ է ստացվել, որ Մասիս խոշորացված համայնքի Դաշտավան բնակավայրի գլխավոր խաչմերուկում ծեծկռտուք է ընթանում։

Դեպքի վայր մեկնած Մասիսի ոստիկաններն ու Արարատի մարզային քրեական վարչության աշխատակիցները հաստատել են ստացված տեղեկության հավաստիությունը։

Համայնքային և քրեական ոստիկանները պատահարի վայրում հայտնաբերել են փայտեր, քարերի բազմաթիվ կտորներ, արնանման հետքեր, գլխարկներ, հողաթափեր և այլ իրեր։

Ըստ նախնական տվյալների՝ նշված վայրից Մասիսի բժշկական կենտրոն է դիմել 10-ից ավելի քաղաքացի։ Տեղում հավաքված մի քանի քաղաքացիներ, հրաժարվելով խոսել տեսախցիկի առջև, պնդում էին, որ լսել են նաև կրակոցներ, ինչը ճշտվում է։ Դեպքի առթիվ ոստիկանության Մասիսի բաժնում կազմված փաստաթղթերը փոխանցվել են ՀՀ քննչական կոմիտեի Արարատի մարզային քննչական վարչության Մասիսի քննչական բաժին։ Դեպքի վայր են ժամանել նաև ՀՀ ՆԳՆ ոստիկանության պարեկային ծառայության Արարատի մարզի գումարտակի պարեկները։

ՆԳՆ-ից auroranews.am-ին հայտնել են, որ տեղի է ունեցել ծեծկռտուք, կան ձերբակալվածներ, իսկ հրազենային վնասվածքով որևէ անձ չկա։