Թրամփը պատրաստ է գաղտնազերծել Քենեդիի սպանության եւ սեպտեմբերի 11-ի ահաբեկչությունների վերաբերյալ փաստաթղթերը

ԱՄՆ նախկին նախագահ Դոնալդ Թրամփը հայտարարել է, որ պետական բարձրագույն պաշտոնում վերընտրվելու դեպքում պատրաստ է գաղտնազերծել 1963 թվականին ԱՄՆ 35-րդ նախագահ Ջոն Քենեդիի սպանությանը, 2001 թվականի սեպտեմբերի 11-ի ահաբեկչություններին, ինչպես նաև Ջեֆրի Էփշտեյնի գործին վերաբերող նյութերը:

Fox News հեռուստաալիքին տված հարցազրույցի ընթացքում լրագրողը հարցրել է, թե արդյոք Թրամփը պատրաստ է վերականգնել ամերիկյան հասարակության վստահությունը այնպիսի մարմինների նկատմամբ, ինչպիսիք են ԿՀՎ-ն և ՀԴԲ-ն, հանել գաղտնիության դրոշմը նշված գործերի վերաբերյալ փաստաթղթերից: Բոլոր երեք գործերին Սպիտակ տան նախկին ղեկավարը դրական պատասխան է տվել։

Բացի այդ, Թրամփը նշել է, որ երբ գտնվում էր ամերիկյան վարչակազմի ղեկին, Քենեդիի սպանության գործով «բազմաթիվ նյութեր» է գաղտնազերծել:

Քաղաքական գործիչը նաեւ հայտարարել է, որ ինքը «մի քանի անուն ունի», որոնց կցանկանար տեսնել ԱՄՆ-ի գլխավոր դատախազի պաշտոնում վերընտրվելու դեպքում եւ խոստովանել է, որ բարձրագույն պետական պաշտոնում գտնվելու ընթացքում մի քանի անգամ սխալ որոշումներ է կայացրել Գլխավոր դատախազի պաշտոնի թեկնածուների վերաբերյալ:

ԱՄՆ նախագահի ընտրությունները տեղի կունենան նոյեմբերի 5-ին: Թրամփն արդեն հավաքել է անհրաժեշտ թվով պատվիրակների ձայներ՝ պետության ղեկավարի պաշտոնում հանրապետականների կողմից թեկնածու առաջադրվելու համար: Երկրորդ ժամկետի համար առաջադրված Ջո Բայդենը ստացել է բավարար թվով Դեմոկրատական պատվիրակների աջակցությունը։ Այսպիսով, պայքարը կընթանա նույն թեկնածուների միջև, ինչ չորս տարի առաջ, երբ Բայդենը հաղթանակ տարավ վերընտրվելու ձգտող Թրամփի նկատմամբ: