Եվրամիությունը պատժամիջոցներ է սահմանել Իրանի պաշտպանության նախարարի նկատմամբ
Եվրոպական Միության խորհուրդը մայիսի 31-ին համալրել է Իրանի և ԿԺԴՀ-ի՝ Ռուսաստանին զենք մատակարարելու մեջ ներգրավված ֆիզիկական և իրավաբանական անձանց նկատմամբ պատժամիջոցների ցանկերը, գրում է DW-ն։
Նոր ցանկերում ներառված են Հյուսիսային Կորեայի վեց ֆիզիկական և Իրանի երեք իրավաբանական անձինք, որոնք բոլորն էլ անմիջականորեն առնչվում են մատակարարումներին:
Ի թիվս այլոց, անօդաչու թռչող սարքերի արտադրության համար ԵՄ-ի նորացված պատժամիջոցների ցանկում են ընդգրկվել Իրանի պաշտպանության նախարար Մոհամմադռեզա Աշտիանին, Իսլամական հեղափոխության պահապանների կորպուսի (ԻՀՊԿ) Ղուդս ուժերի հրամանատար Իսմայիլ Քաանին, Ավիացիոն արդյունաբերության կազմակերպության ղեկավար Աֆշին Հաջի Ֆարդը և բաղադրիչների առքուվաճառքով զբաղվող Kavan Electro ընկերությունը: ԿԺԴՀ-ի ներկայացուցիչների անունները ԵՄ խորհրդի պաշտոնական կայքում չկան։
Բացի Հյուսիսային Կորեայի քաղաքացիներից և ընկերություններից, ԵՄ պատժամիջոցների տակ են հայտնվել նաև ՌԴ Պրիմորսկի երկրամասի նահանգապետ Օլեգ Կոժեմյակոն և ռուսական մի ընկերություն։
