Բագրատ Սրբազանը դիմել է Արցախի քաղաքական վերնախավին

«Տավուշը հանուն հայրենիքի» շարժման առաջնորդ Բագրատ արքեպիսկոպոս Գալստանյանը հանդիպել է Արցախի քաղաքական ղեկավարության և արցախցիների հետ և ներկայացրել առաջիկա անելիքները, ինչպես նաև շարժման տրամաբանությունը։

«Սահմանազատման և սահմանագծման գործընթացը ոչ միայն մեր ապագայի հարցն է, այլև ներկայում տեղի ունեցող աղետ։ Այդ գործընթացի իրավական հատվածն ամբողջությամբ հակասում է և՛ մեր սահմանադրությանը, և միջազգային սկզբունքներին։ Մեր գնահատմամբ՝ սա խաղաղության հասնելու կեղծ օրակարգ է։ Մեր այս շարժման նպատակն իրական խաղաղություն ունենալն է` թե՛ մտքի, թե՛ ֆիզիկական, իսկ պատերազմի հրահրողն այսօրվա գործող իշխանությունն է իր ղեկավարով հանդերձ։ Այս պայքարը ճշմարտության մասին է և այն պետք է հաղթի, այլընտրանք չկա։ Մեզ համար առաջնային է երկրում հաշտության օրակարգ ունենալը, օրինակ` արցախցի և հայաստանցի, սև և սպիտակ բաժանումը, ատելությունը մենք պետք է վերացնենք»,– նշեց սրբազանը։

Նրա խոսքով` 24-ժամյա աշխատանք պետք է տանել երկիրը ստեղծված իրավիճակից հանելու համար` և՛ ներքին, և՛ արտաքին հարթակներում։ Ըստ նրա` լուծումները լինելու են տեխնիկական և նյութական, բայց մինչ այդ մարդու միտքը պետք է պարզ լինի` միտված հայրենիք և պատիվ ունենալուն։

Տավուշի թեմի առաջնորդն ընդգծեց, որ շատ կարևոր է նաև մշտապես ուշադրության կենտրոնում պահել Արցախի հարցը, քանի որ այն պակաս կարևոր չէ Հայոց ցեղասպանության հարցից։ Բագրատ սրբազանի պնդմամբ` հարցը պետք է դառնա հայրենական և չտարանջատվի։

Նրա խոսքով` Հայաստանը շատ փխրուն վիճակում է գտնվում այս պահին, ինչի մասին վկայում է այն հանգամանքը, որ Տավուշում սահմանազատման վերաբերյալ ադրբեջանական կողմի հայտարարությունները մինչ օրս մնացել են անպատասխան:

Ավելի վաղ Ադրբեջանի նախագահ Իլհամ Ալիևն օկուպացված Շուշիում հայտարարել էր, որ Հայաստանի հետ սահմանազատումն ու սահմանագծումն ընթանում են ադրբեջանական պայմաններով և շարունակվելու են նույն ոգով: Նա ընդգծել էր նաև, որ իրենց մեկ պահանջով Ղազախի 4 գյուղ է վերադառնում առանց մի կրակոցի, ու այդպես շարունակվելու է նաև հետագայում։

Սրբազանը նշեց, որ փաստորեն հայրենիքը կտոր-կտոր զիջում են հակառակորդին, իսկ հետևանքները ոչ մեկին չեն հետաքրքրում: Հանդիպման մյուս հատվածը շարունակվեց փակ ռեժիմով։