Բանակցությունները փակուղում են, որից ելք դեռ չի երևում․ Թուրքիայի ԱԳ նախարար
Գազայի հատվածում հրադադարի հնարավորության շուրջ բանակցությունները փակուղում են, որից ելք դեռ չի երևում: Այս մասին թուրքական NTV հեռուստաալիքի եթերում հայտարարել է Թուրքիայի ԱԳ նախարար Հաքան Ֆիդանը։
Ֆիդանը պատմել է, որ մայիսի 15-ին այդ թեմայով հեռախոսազրույցներ է ունեցել ԱՄՆ պետքարտուղար Էնթոնի Բլինքենի, Կատարի վարչապետ Աբդել Ռահման Ալ Թանիի եւ ՀԱՄԱՍ-ի քաղբյուրոյի առաջնորդ Իսմայիլ Հանիայի հետ:
«Գազայում հրադադարի հարցում մենք գտնվում ենք նույն տեղում, ինչ նախորդ շաբաթ՝ փակուղային վիճակում», - հայտարարել Է Թուրքիայի ԱԳ նախարարը:
Նա նաև վստահություն է հայտնել, որ բանակցություններում առաջընթացի հասնելու համար ԱՄՆ-ն պետք է ստիպի Իսրայելին գնալ հրադադարի:
Մայիսի 14-ին Ռուսաստանն ու Եգիպտոսը դատապարտել են Ռաֆահում Իսրայելի ծրագրերը: Դա քաղաքի արևելյան հատված իսրայելական տանկերի մուտքի հետևանքն էր։
ՄԱԿ-ի պաղեստինյան փախստականների հարցերով գործակալության տվյալներով՝ շուրջ 450 հազար պաղեստինցիներ վերջին շաբաթվա ընթացքում լքել են Ռաֆահը՝ Իսրայելի կողմից ռազմական գործողությունների ակտիվացման ֆոնին:
Իսրայելը խոստացել է շարունակել հարձակումը Ռաֆայի վրա նույնիսկ առանց դաշնակիցների աջակցության, չնայած այն հանգամանքին, որ երկրի միջազգային դաշնակիցները և օգնության կազմակերպությունները բազմիցս կոչ են արել ցամաքային ներխուժում չիրականացնել քաղաք:
