ՏԵՍԱՆՅՈՒԹ․ ԵՊՀ–ի ուսանողների վրա ճնշումներ չեն գործադրվել․ մանրամասներ
ԵՊՀ պրոռեկտոր Էլինա Ասրիյանը վստահեցնում է, որ բուհի ուսանողների վրա ճնշում չի գործադրվել, դա զրպարտություն է։ «Տավուշը հանուն հայրենիքի» շարժման առաջնորդ Բագրատ սրբազանը ԵՊՀ բակում հայտարարեց, որ իրեն էլ են հասել այդ լուրերը և հորդորեց հերքել դրանք, եթե նման բան չի եղել։
Էլինա Ասրիյանը դուրս եկավ ԵՊՀ–ից շենքից և խոսեց Բագրատ սրբազանի հետ։ Նա հերքեց այդ լուրերը։
«Ես շատ վիրավորված եմ, որ կարելի է զրպարտել մարդուն։ Եթե չէիք հավատում, պետք է չասեիք»,–ասաց Ասրիյանը։
Բագրատ սրբազանն իր հերթին նշեց, որ ինքն այդ լուրերին չի հավատացել, ուստի եկել է, որ ԵՊՀ–ից հերքեն։
«Շատ ուրախացա, որ դուք այստեղ եք, դուրս եկա, ձեզ դիմավորելու համար։ Երեկ որևէ հանդիպում, որևէ դեկանի հետ չի եղել, հետևապես որևէ նման հայտարարություն չի կարող լինել։ ԵՊՀ–ն ուսանողակենտրոն է, և այստեղ ուսանողների իրավունքները պաշտպանված են»,– ասաց պրոռեկտորը։
Հիշեցնենք՝ երեկ լուրեր էին տարածվել, որ Ասրիյանը ժողով է անցկացրել դեկանների հետ և ասել` բոլոր այն ուսանողներին, որոնք շատ բացականեր ունեն, պետք է նկատողություն հայտարարել, և պետք է ամեն գնով դադարեցնել ուսանողների դասադուլը։
